پاکستان نے جمعے کو تین ون ڈے میچز کی سیریز کے پہلے میچ میں ویسٹ انڈیز کو پانچ وکٹوں سے شکست دے دی۔
تروبا کے برائن لارا کرکٹ اکیڈمی سٹیڈیم میں کھیلے گئے پہلے میچ میں کپتان محمد رضوان اور ڈیبیو کرنے والے حسن نواز نے نصف سنچریاں سکور کیں جبکہ بابر اعظم اور حسین طلعت نے ہدف کے تعاقب میں بھرپور تعاون فراہم کیا۔
اس سے قبل ویسٹ انڈیز نے پہلے بیٹنگ کرتے ہوئے ایون لوئس، کپتان شائی ہوپ اور روسٹن چیز کی نصف سنچریوں کی بدولت 280 رنز بنائے۔
281 رنز کے ہدف کے تعاقب میں پاکستان کو ابتدائی نقصان اس وقت اٹھانا پڑا جب اوپنر صائم ایوب تیسرے اوور میں جیڈن سیلز کی گیند پر محض پانچ رنز بنا کر آؤٹ ہو گئے۔
عبداللہ شفیق نے بابر اعظم کے ساتھ مل کر دوسری وکٹ کی شراکت میں 47 رنز جوڑے تاہم 29 رنز (33 گیندوں، تین چوکے، ایک چھکا) کی اننگز کھیل کر وہ بھی آؤٹ ہو گئے۔
بابر اور رضوان نے تیسری وکٹ کی شراکت میں 55 رنز بنائے اور ٹیم کو سنبھالے رکھا مگر بابر نصف سنچری سے صرف تین رنز کی دوری پر 47 رنز (64 گیندوں، پانچ چوکے، ایک چھکا) بنا کر سٹمپ ہو گئے۔
اس کے بعد سلمان علی آغا نے 23 رنز (26 گیندوں) بنائے لیکن وہ بھی روسٹن چیز کے ہاتھوں آؤٹ ہو گئے۔ اس کے بعد رضوان نے اپنی 16ویں ون ڈے نصف سنچری مکمل کی اور حسن نواز کے ساتھ مل کر سکور کو آگے بڑھایا۔
جوزف نے رضوان کو 53 رنز پر آؤٹ کیا تو اس وقت پاکستان کا سکور 180 تھا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
کپتان کے آؤٹ ہونے کے بعد حسن نواز اور آل راؤنڈر حسین طلعت نے چھٹی وکٹ کی شراکت میں ناقابل شکست سنچری پارٹنرشپ قائم کر کے ٹیم کو فتح دلا دی۔
حسن نواز نے اپنی پہلی ون ڈے نصف سنچری مکمل کی۔ وہ 63 رنز (54 گیندوں، چار چوکے، تین چھکے) بنا کر ناٹ آؤٹ رہے۔ حسین طلعت نے 41 رنز (37 گیندوں، چار چوکے، ایک چھکا) کی ناقابل شکست اننگز کھیلی اور پاکستان نے ہدف 48.5 اوورز میں حاصل کر لیا۔
اس سے قبل ویسٹ انڈیز کی اننگز کا آغاز مایوس کن رہا اور برینڈن کنگ پہلی ہی اوور میں شاہین آفریدی کے ہاتھوں چار رنز پر آؤٹ ہو گئے۔ ایون لوئس اور کیسی کارٹی نے 50 رنز کی شراکت قائم کی لیکن لوئس 60 رنز (62 گیندوں، پانچ چوکے، تین چھکے) بنا کر صائم ایوب کی گیند پر آؤٹ ہوئے۔
کپتان شائی ہوپ نے 55 رنز (77 گیندوں) بنائے اور روسٹن چیز کے ساتھ 64 رنز کی پارٹنرشپ قائم کی۔ چیز نے 53 رنز (54 گیندوں) سکور کیے مگر نسیم شاہ کی گیند پر آؤٹ ہو گئے۔
گڈاکیش موتی نے اختتامی اوورز میں جارحانہ 31 رنز (18 گیندوں، تین چوکے، دو چھکے) بنا کر ٹیم کا سکور 280 تک پہنچایا تاہم میزبان ٹیم 49ویں اوور میں آؤٹ ہو گئی۔
شاہین آفریدی نے 8 اوورز میں 51 رنز دے کر چار وکٹیں حاصل کیں جبکہ نسیم شاہ نے 55 رنز کے عوض تین وکٹیں لیں۔ صائم ایوب، سفیان مقیم اور سلمان علی آغا نے ایک، ایک وکٹ حاصل کی۔
اس جیت کے ساتھ پاکستان نے سیریز میں 0-1 کی برتری حاصل کر لی، دوسرا ون ڈے اتوار کو کھیلا جائے گا۔
<p>8 اگست 2025 کو ٹرینیڈاڈ اور ٹوباگو کے شہر تروبا میں پاکستان کے حسین طلعت (بائیں) اور حسن نواز (دائیں) ویسٹ انڈیز کے خلاف پہلا ون ڈے انٹرنیشنل میچ جیتنے کے بعد خوشی کا اظہار کر رہے ہیں (اے ایف پی)</p>
from Independent Urdu https://ift.tt/iwVJxMa