امریکی صدر ڈونلڈ ٹرمپ 14 سے 15 مئی کو چین کے دورے پر جانے والے ہیں، جہاں ان کی چینی رہنما شی جن پنگ سے ملاقات متوقع ہے۔ ایران جنگ کے باعث یہ سربراہی ملاقات مؤخر کر دی گئی تھی۔
آئیں دیکھیں کہ بیجنگ اس دورے سے کیا حاصل کرنا چاہتا ہے؟
تجزیہ کاروں کے مطابق سفارتی خوش اخلاقی اور بند دروازوں کے پیچھے ہونے والی بات چیت سے ہٹ کر، بیجنگ چھوٹی مگر ٹھوس کامیابیوں کی تلاش میں ہوگا، تاہم ٹرمپ کی غیر متوقع شخصیت کے باعث وہ ’حقیقت پسندانہ حکمت عملی‘ اختیار کرے گا۔
بینجمن ہو، جو سنگاپور کے ایس راجارتنم سکول آف انٹرنیشنل سٹڈیز سے وابستہ ہیں، نے کہا کہ چین تعلقات میں وسیع پیمانے پر بہتری چاہتا ہے لیکن اسے معلوم ہے کہ یہ آسان نہیں ہوگا۔
بیجنگ اور واشنگٹن ایک شدید تجارتی جنگ میں الجھے رہے، جس میں کئی چینی اشیا پر امریکی محصولات 145 فیصد تک پہنچ گئی تھیں۔
یہ کشیدگی اس وقت کچھ کم ہوئی جب ٹرمپ اور شی جن پنگ نے اکتوبر میں ایک سالہ جنگ بندی پر اتفاق کیا۔ ماہرین کے مطابق آئندہ ملاقات میں چین کی بنیادی کوشش اس معاہدے میں توسیع ہو گی۔
یو سو نے کہا: ’چین کو ضرورت اس بات کی ہے کہ ٹرمپ اپنی مذاکراتی یقین دہانی پر عمل کریں اور اعلیٰ سطح پر کم از کم چند ٹھوس نتائج سامنے آئیں۔‘
ان کے مطابق بیجنگ محدود ٹیرف کمی جیسے ’ہدفی‘ نتائج پر مطمئن ہو سکتا ہے، تاکہ وہ بھی اپنے محصولات یا برآمدی پابندیوں میں نرمی کا جواز پیدا کر سکے۔
ایران جنگ کا کیا اثر ہو گا؟
ماہرین کے مطابق ٹرمپ اور شی جن پنگ کی ملاقات میں ایران کا موضوع ’نظر انداز کرنا مشکل‘ ہوگا، لیکن ’یہ ایسا میدان نہیں جس میں چین زیادہ شامل ہونا چاہتا ہو۔‘
لزی لی، جو ایشیا سوسائٹی پالیسی انسٹی ٹیوٹ سے وابستہ ہیں، نے کہا کہ امریکہ سربراہی ملاقات سے پہلے چین پر دباؤ بڑھا رہا ہے اور تہران کے ساتھ اس کے معاشی تعلقات کو نشانہ بنا رہا ہے۔
ٹرمپ نے گذشتہ ماہ خبردار کیا تھا کہ اگر چین نے ایران کو فوجی مدد فراہم کی تو وہ چینی مصنوعات پر 50 فیصد ٹیرف عائد کریں گے۔
بیجنگ تہران کا قریبی شراکت دار ہے اور اس نے ایران پر امریکی اور اسرائیلی حملوں کو غیر قانونی قرار دیا ہے، تاہم اس نے خلیجی ممالک پر ایرانی حملوں پر تنقید بھی کی اور آبنائے ہرمز دوبارہ کھولنے کا مطالبہ کیا۔
تاہم اکنامسٹ انٹیلی جنس یونٹ کی یوئے سو کے مطابق چین امریکہ کے دباؤ کو قبول نہیں کرے گا کہ وہ ایران یا روس کے خلاف کارروائی کرے، کیونکہ ان ممالک پر اس کا ’کچھ اثر و رسوخ تو ہے مگر فیصلہ کن کنٹرول نہیں۔‘
بیجنگ اس بات کی بھی کوشش کرے گا کہ ایران کے ساتھ تجارت کے حوالے سے نئے امریکی ٹیرف پہلے سے پیچیدہ تعلقات کو مزید خراب نہ کریں۔
لزی لی کے مطابق ایران جنگ ’باہمی دباؤ کی ایک اور تہہ‘ ضرور بڑھائے گی، لیکن اصل مذاکراتی میدان تجارت اور سرمایہ کاری ہی رہے گا۔
چین کے پاس کیا ہے؟
چین کے اہم ترین سودے بازی کے ذرائع میں اس کی ’ریئر ارتھ‘ دھاتیں شامل ہیں، جو سمارٹ فونز سے لے کر الیکٹرک گاڑیوں تک ہر چیز کی تیاری میں ضروری سمجھی جاتی ہیں۔
قدرتی ذخائر، کان کنی، پروسیسنگ اور جدت طرازی میں چین کی برتری کئی دہائیوں پر محیط حکمت عملی کا نتیجہ ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
یوئے سو کے مطابق اگر امریکہ سے معنی خیز رعایتیں حاصل کرنا مقصود ہوں تو یہ چین کا سب سے مضبوط ہتھیار ہے۔
بیجنگ میں قائم مشاورتی ادارے کے جغرافیائی سیاست کے تجزیہ کار جو مازور نے کہا کہ ٹرمپ ریئر ارتھ دھاتوں کو ’بہت اہمیت دیتے ہیں۔‘
انہوں نے کہا: ’میرے خیال میں یہ ایسا معاملہ ہے جس کا امریکہ کے پاس واقعی کوئی واضح جواب نہیں۔‘
مازور کے مطابق چین دورے سے پہلے ’فوری کامیابیاں‘ حاصل کرنے کی کوشش کرے گا، جن میں مزید امریکی زرعی مصنوعات یا بوئنگ طیارے خریدنا شامل ہو سکتا ہے۔
ان کے بقول چین امید کرے گا کہ اس سے ٹرمپ اور ان کی ٹیم زیادہ پیچیدہ اور حساس معاملات پر گفتگو کے وقت مثبت ذہنی کیفیت میں ہوں گے۔
بیجنگ نے تیاری کیسے کی؟
لزی لی کے مطابق چین نے ٹرمپ کی پالیسیز کے باعث پیدا ہونے والی غیر یقینی صورت حال سے نمٹنے کے لیے جنوب مشرقی ایشیا اور گلوبل ساؤتھ کی طرف تجارت کا رخ موڑا، جبکہ علاقائی تعلقات بھی مضبوط کیے۔
انہوں نے کہا کہ بیجنگ نے اپنے قانونی اور ضابطہ جاتی نظام کو بھی مزید مضبوط بنایا ہے اور اب اس کے پاس ’زیادہ وسیع حکمت عملی‘ موجود ہے، جیسا کہ حال ہی میں ٹیکنالوجی کمپنی میٹا کی اے آئی فرم مانوس (Manus) کے حصول کو روکنے سے ظاہر ہوتا ہے۔
تاہم مازور کے مطابق توانائی درآمدات میں تنوع، بجلی پر منتقلی اور ٹیکنالوجی میں خود کفالت جیسے کئی اقدامات ٹرمپ کی دوسری مدت صدارت سے پہلے ہی شروع ہو چکے تھے۔
انہوں نے کہا: ’اگر یہ ملاقات غیر معمولی حد تک کامیاب بھی ہو جائے تو بھی اس سے چین کی مجموعی سمت تبدیل نہیں ہو گی۔‘
’چینی معیشت کو امریکہ سے محفوظ بنانے کی کوشش ہر صورت جاری رہے گی، چاہے کچھ بھی ہو جائے۔‘
کیا چین پراعتماد ہے؟
لزی لی کے مطابق بیجنگ مذاکرات میں ’محتاط اعتماد‘ کے ساتھ داخل ہوگا۔
اسے یقین ہے کہ اب وہ دباؤ کو پہلے سے بہتر انداز میں برداشت کر سکتا ہے اور ٹرمپ کے مقابلے میں ’طویل کھیل‘ کھیلنے میں زیادہ آرام دہ محسوس کرتا ہے، کیونکہ ٹرمپ کو وسط مدتی انتخابات کے دباؤ کا سامنا ہے۔
روسی صدر ولادی میر پوتن کے بیجنگ دورے کا بھی امکان ہے۔ روسی وزیر خارجہ سرگئے لاروف نے، جنہوں نے اپریل میں شی جن پنگ سے ملاقات کی تھی، کہا ہے کہ یہ دورہ رواں سال کے پہلے نصف میں ہو گا۔
مازور نے اے ایف پی کو بتایا کہ اگر ٹرمپ کے بعد فوری طور پر پوتن کا دورہ ہوتا ہے تو اس سے یہ پیغام جائے گا کہ ’صرف اس وجہ سے کہ شی جن پنگ کی ٹرمپ سے اچھی ملاقات ہوئی، اس کا مطلب یہ نہیں کہ روس کے لیے چین کی حمایت کہیں جا رہی ہے۔‘
’یہ تعلق انتہائی مضبوط ہے۔‘
<p class="rteright">30 اکتوبر، 2025 کی اس تصویر میں چینی صدر شی جن پنگ اور امریکی صدر ڈونلڈ ٹرمپ جنوبی کوریا کے شہر بوسان میں ملاقات کے دوران(اے ایف پی)</p>
from Independent Urdu https://ift.tt/GTQOw0D